En quai che pertutga las finamiras na sa distinguan las instituziuns prescolaras en la Svizra tudestga, franzosa, taliana e rumantscha betg essenzialmain: la scolina (resp. Kindergarten, école enfantine e scuola dell'infanzia) promova il svilup dals uffants ed als prepara per l'entrada en scola. Quai succeda senza ina valitaziun sistematica da las prestaziuns e senza selecziun (i na dat nagina classificaziun en gruppas da prestaziun).
La scolina duai promover mintga uffant tenor ses stadi da svilup e tenor ses basegns. Accentuada vegn la promoziun da l'autonomia dals uffants, l'autocumpetenza, la cumpetenza sociala e la cumpetenza en la materia.

 

Plans d'instrucziun
Ils novs plans d'instrucziun per la scolina han la medema basa e las medemas finamiras da furmaziun sco ils plans d'instrucziun dal stgalim primar. Ils cuntegns da furmaziun vegnan formulads en finamiras d'emprender liantas. Diesch chantuns da la Svizra tudestga han il medem plan d'instrucziun. Tut tenor il plan d'instrucziun vegnan formuladas las finamiras per ils singuls roms (p.ex. uman ed ambient, moviment, lingua, lavur creativa, musica, occupaziun matematica) u differenziadas tenor finamiras interdisciplinaras (p.ex. sviluppar pussaivladads da sa mover, differenziar las abilitads da percepziun, ir enturn cun success e cun nunsuccess, percepir e tematisar process en la natira, vesair ed applitgar las reglas da la lingua discurrida e.u.v.). Il plan d'instrucziun da la Svizra franzosa PECARO, ma era auters plans d'instrucziun chantunals, fixeschan per il stgalim prescolar las finamiras dals medems roms e dals medems champs d'emprender sco per il stgalim primar e per il stgalim secundar I.