En scola primara vegnan las prestaziuns da scola valitadas cun notas u cun rapports davart l'emprender. Durant l'emprim onn da scola na datti en la gronda part dals chantuns naginas notas, mabain discurs da giudicament u rapports davart l'emprender. Sch'i vegn dà notas, alura vegnan quellas fatgas cun ina scala da notas dad 1 fin 6 (6 = meglra nota). Per gronda part survegnan las scolaras ed ils scolars duas giadas l'onn in attestat cun las notas resp. in rapport davart l'emprender. Intgins chantuns realiseschan projects davart ina valitaziun ch'è orientada a las finamiras da l'instrucziun: las scolaras ed ils scolars survegnan ina collecziun d'incumbensas d'in stgalim u d'ina classa che cuvran ils champs centrals dal plan d'instrucziun correspundent.

 

Midada en la proxima classa
En scola primara vegn decidì a la fin da mintga onn da scola, schebain las scolaras ed ils scolars pon midar en la proxima classa sin fundament da lur prestaziuns. Intgins chantuns han introducì ciclus d'emprender da plirs onns. Durant quests ciclus d'emprender na vegnan repetidas naginas classas. Sin il stgalim primar han - l'onn da scola 2000/2001 - radund 2% da las scolaras e dals scolars stuì repeter ina classa. La quota da repetiziun variescha tut tenor l'onn da scola (dad 1,4% fin 2,6%) e tenor il chantun (da 0,7% fin 3,4%).

Midada en scolas spezialas
Sch'in uffant ha, suenter avair repetì ina classa, pitschnas schanzas da reussir, mida el savens en ina scola da pedagogia speziala cun in plan d'instrucziun spezial. Davart la midada da scola decidan ils geniturs ensemen cun la persuna d'instrucziun, cun l'inspecturat da scola e cun il servetsch psicologic da scola.

Agid per far pensums e curs da promoziun
En la gronda part dals chantuns datti la pussaivladad che singulas scolaras e che singuls scolars pon survegnir sustegn, tranter auter en furma dad agid per far pensums u da curs da promoziun.