A la fin dal stgalim primar na survegnan las scolaras ed ils scolars betg in attestat u in certificat final. Tut las scolaras e tut ils scolars pon cuntinuar cun lur scolaziun sin il stgalim secundar I.

 

Midada en il stgalim secundar I
Tar la midada dal stgalim primar al stgalim secundar I succeda - en chantuns cun differents tips da scola - in'emprima selecziun, q.v.d. ina separaziun en gruppas da prestaziun. Da princip datti dus tips da scola: scolas cun pretensiuns elementaras (p.ex. scolas realas, "section pratique") e scolas cun pretensiuns extendidas (p.ex. scolas secundaras). En intgins chantuns vegn il stgalim secundar I dividì en trais tips da scola: scolas cun pretensiuns elementaras (p.ex. scola reala, "voie secondaire à options"), scolas cun pretensiuns mesaunas (p.ex. scola secundara, "voie générale") e scolas cun pretensiuns pli autas (p.ex. "Bezirksschule", "voie de baccalauréat"). Ina minoritad dals chantuns desista da divider il stgalim secundar I en differents tips da scola.

Recumandaziuns
Las prestaziuns en la scola primara e las recumandaziuns da las persunas d'instrucziun decidan, tge tip da scola dal stgalim secundar I che las scolaras e ch'ils scolars pon frequentar. Las recumandaziuns da las persunas d'instrucziun na sa basan betg mo sin las prestaziuns da scola, mabain adina pli savens era sin giudicats davart il svilup individual da las prestaziuns e davart la tenuta da lavurar e d'emprender. Savens vegnan ils geniturs da las scolaras e dals scolars integrads en questa procedura.

Examen
En ina pitschna part dals chantuns ston las scolaras ed ils scolars far in examen per pudair midar en in tip da scola cun pretensiuns extendidas. Intgins chantuns planiseschan d'introducir examens interchantunals che duain vegnir resguardads supplementarmain tar las recumandaziuns da las persunas d'instrucziun.