Las scolas medias spezialisadas (SMS) èn - ultra da las scolas da maturitad - scolas da furmaziun generala dal stgalim secundar II. Sin fundament da las refurmas e dals svilups en la furmaziun professiunala ed en la furmaziun da maturitad èn las anteriuras scolas medias da diplom (SMD) vegnidas remplazzadas la stad 2004 tras las scolas medias spezialisadas (SMS). Ina gronda part dals chantuns ha gia introducì las scolas medias spezialisadas. Ils ultims chantuns las vegnan ad introducir probablamain l'onn 2006. Intginas dumondas en connex cun la maturitad spezialisada ston anc vegnir scleridas il proxim temp.

 

Scolaziun
Las scolas medias spezialisadas (SMS) preparan per scolaziuns professiunalas superiuras (scolas spezialisadas superiuras, scolas autas professiunalas en ils suandants secturs: sanadad, champ social, pedagogia, communicaziun ed infurmaziun (linguistica applitgada), art ed art applitgà, musica e teater, psicologia applitgada.
La scolaziun a las scolas medias spezialisadas (SMS) fin a l'emprim diplom (diplom da scola media spezialisada) dura trais onns.

Maturitad spezialisada
Cun prestaziuns supplementaras (praticums u lecziuns supplementaras) po vegnir acquistà in ulteriur certificat da scolaziun (maturitad spezialisada).

Basas giuridicas
Las scolas medias spezialisadas (SMS) stattan en la cumpetenza dals chantuns. Il "reglament davart la renconuschientscha dals diploms da las scolas medias spezialisadas", approvà da la conferenza svizra da las directuras e dals directurs chantunals da l'educaziun publica (CDEP) ils 12 da zercladur 2003, ed il plan d'instrucziun da basa per las scolas medias spezialisadas (SMS) dals 9 da settember 2004 èn la premissa per la renconuschientscha interchantunala da las scolas medias spezialisadas (SMS).