Il stgalim terziar cumpiglia scolaziuns en il rom da la furmaziun professiunala superiura ed en il rom da las scolas autas:

 

 

 

En il sectur terziar èn tant ils chantuns sco era la confederaziun cumpetents per la legislaziun. Tenor la constituziun federala ha la confederaziun la cumpetenza regulativa per il sectur da la furmaziun professiunala superiura. Ella è ultra da quai responsabla per las scolas autas professiunalas. Era las scolas politecnicas federalas (SPF) stattan en la cumpetenza da la confederaziun. Ils singuls chantuns pertutgads èn responsabels per lur scolas autas universitaras chantunalas e per las scolas autas da pedagogia (SAP). Per las SAP valan era basas legalas interchantunalas.
Las scolas autas d'art e da musica sco era las scolas autas da pedagogia èn per part integradas en scolas autas professiunalas, per part èn ellas independentas.
L'onn 2003/2004 eran en Svizra 196'482 studentas e students en ina scolaziun terziara.

Furmaziun professiunala superiura
La furmaziun professiunala superiura serva sin il stgalim terziar a l'intermediaziun ed a l'acquist da las qualificaziuns necessarias per exercitar professiuns pretensiusas da gronda responsabladad. La premissa è in attestat federal da qualificaziun, il diplom d'ina scola superiura da furmaziun generala u ina qualificaziun equivalenta.

Purschids vegnan passa 350 examens professiunals resp. examens professiunals superiurs renconuschids. L'examen professiunal finescha cun in certificat professiunal federal, l'examen professiunal superiur cun in diplom. L'onn 2004 èn vegnids surdads 11'368 certificats professiunals federals e 3'195 diploms.

Las scolas professiunals superiuras porschan curs da furmaziun e studis da diplom supplementars renconuschids sin plaun federal per ils suandants secturs: tecnica; gastronomia, turissem ed economia da chasa; economia; agricultura ed economia forestala; sanadad; champ social e furmaziun da persunas creschidas; art ed art applitgà.
L'onn 2004 èn vegnids surdads 4'067 diploms. Cunquai ch'ils secturs da sanadad, dal champ social e da l'art èn vegnids suttamess l'onn 2004 a la lescha davart la furmaziun professiunala, vegn probablamain a sa dublegiar il dumber da diploms che vegnan surdads.

Scolas autas
Las scolas autas universitaras chantunalas porschan studis da teologia, da scienzas umanas e da scienzas socialas, da matematica e da scienzas natiralas, da dretg, d'economia, da medischina e da farmazia, entant che las scolas politecnicas federalas porschan studis da scienzas natiralas e da scienzas d'inschigneria, d'architectura, da matematica, da scienzas farmaceuticas, da scienzas da sport sco era scienzas militaras.
Per l'onn 2004 quintan ins cun 9'800 diploms da scol'auta resp. licenziats.

Las scolas autas professiunalas porschan studis ch'èn orientads a la pratica en ils suandants secturs: tecnica e tecnologia d'infurmaziun; architectura, construcziun e planisaziun; chemia e scienzas da la vita; agricultura ed economia forestala; economia e servetschs; design; sanadad, lavur sociala; art, musica, teater; psicologia applitgada; linguistica applitgada. Las scolas autas da pedagogia (SAP) èn responsablas per la furmaziun da las persunas d'instrucziun. L'onn 2004 èn vegnids surdads 7'265 diploms da scolas autas professiunalas.
L'onn 2004 han en tut 160'000 studentas e students frequentà ina scol'auta svizra, passa dus terzs da quellas e da quels ina scol'auta universitara e stgars in terz ina scol'auta professiunala.